車頂營 (roof top tent, RTT) 基本上分成兩種，soft shell 軟殼/軟頂營同埋 hard shell 硬殻/硬頂營。軟頂硬頂好易分，未開之前四四方方成舊磚咁嘅係軟頂，長方形佔哂成個車頂嘅係硬頂。
———————
軟頂車頂營平時對摺摺埋四四方方，除左個雨冚之後向車身外面翻出黎，變成長一倍嘅長方形，突出車身外嘅半邊用堂梯借力承重。
優點係
- 比較平：外國牌子萬幾2萬蚊(未計運費)
- 比較輕：一般40幾-50幾kg，除左細車外大部分車車頂都應該夠力承載
- 佔位小：如果有車頂架，裝完軟頂前面仲可以放多兩個箱或者脫困板
- 遮陰：打開後突出車身外嘅部份可以遮陰。有d營仲有配件可以圍起呢個空間，做廳或者多間房 (annex room)
- 訓嘅空間可以較大：一個訓3-4人嘅營，平時摺埋都唔會太大。相反硬頂如果要訓3-4人，會大舊得好誇張，闊過車身突出黎，同埋勁重
- 睇星：多數都有天窗，可以訓係入面直接望天空 (雖然天窗塊膠未必好清)
缺點係
- Setup耐/麻煩：要10-15分鐘
- 要有較大空間開：打開後會佔車身之外空間，太細地方唔方便
- 冇咁隔熱：始終主要物料係布料，如果平價嘅營落大雨仲可能漏水滲水
- 較難清潔：相比硬頂個殻，成個軟頂都係布料較難清潔，落完雨收營較易會up住
- 風阻：平時成舊大磚頭咁，風阻大
———————
硬頂車頂營平時係個長方形，開營一般係向上升起，個營平時收埋幾大訓嘅空間就係幾大。
優點係
Setup快/簡單：向上推起就係，最快10秒開好，耐嘅5分鐘都搞掂
較少風阻：一般比軟頂扁，有d款比較流線型
頭部空間大啲：因為唔似軟頂咁係扁三角形，頭部垂直空間一般都鬆動d
較舒適(見仁見智)：因為唔洗摺埋，床褥一般都會厚d。同埋有訓係間屋嘅感覺，比較有安全感(尤其大風大雨嗰陣)
缺點係
超貴：差唔多係同質素軟頂嘅1倍價錢，外國牌子至少2、3萬(未計運費)
超笨重：一般成60幾70kg，唔係架架車裝到。兩個人抬上高身車都好chur
車頂冇位剩：裝左硬頂車頂架放唔落其他野
